شخصيتك من نوع قهوتك

إعرف شخصيتك من نوع قهوتك 🤔
القهوة ليها شوية مسميات ميعرفهاش غير عشاق القهوة بجد, لو كُنت لسه جديد في شُرب و عشق القهوة فإنت لازم هتمر علي المراحل الجايه بالتدريج لحد ما توصل لأخر مرحله و هي وحشش القهوة:
1-  السرياقوسي : و بتكون عباره عن 3 معالق سكر لكل معلقه بن ( 3سكر : 1بن )  القهوة السرياقوسي معظم الي بيشربوها بيكونو لسه جداد علي شُرب القهوة و أكتر ناس مفضلين ليها النساء .. و المرحله دي مبتدأ القهوة مبيفضلش فيها علي طول فتره و بينقل علي الي بعدها 😌
2- الزياده : القهوة الزيادة بتكون معلقتين سكر لكل معلقه بن ( 2 سكر : 1 بن ) القهوة الزيادة دي تاني مرحله لإدمان القهوة اللذيذه غير إن طعم السكر الزيادة فيها بيكسر طعم البن المُر إلي إنت كمبتدئ لسه متعودتش عليه 😋
في ناس بتحب إنها تفضل في المرحله دي و دول أغلبهم ناس بتشرب القهوة For Fun بس مبيقدروش يستمتعو بمزاج القهوة المانو أو المظبوط
3- المانو : ظبطتها بتكون ( 1.5 سكر : 1 بن ) لما توصل لمرحله المانو يبقي مفضلكش كتير علي مرحله الوحش و إنت كدة في السليم قادر تستمتع بـ طعم القهوة المُر بنسبه 50% و سكرك حنين شوية .. و في المرحله دي في ناس بتكون زهقت من الزيادة او عاوزه تقلل السكر في القهوة بالتدريج .. المرحله دي مينفعش برضو تطول فيها لو عاوز تستمتع بمزاج القهوة العالي 😍
4- المظبوط  : جاايه من إسمها مظبوطه بالظبط ( 1 سكر : 1 بن ) قهوة متكافئه في كل حاجة و إنت كدة شخصيتك عادله و متوازنه .. بتقدر تستمتع بطعم البن بكميه سكر متوازنه بيخلقلك جو من السعادة المفرطه .. عشان كده عشاق القهوة المظبوطه شخص برنس في نفسه لأقصي مرحله 😎
5- ع الريحه : ( 5, سكر : 1 بن ) كده إنت فاضلك خطوه واحدة علي ليفل الوحش و بدأت تفهم يعني إيه شُرب قهوة صح و إستمتاع بكوبايه قهوة مع شوية سكر صغيرين يدوبو مع مراره القهوة يعملو أحلي جو و النوع ده لـ Professionals  القهوة بسسس عشان مستحيل تلاقي مبتدأين بيشربوا القهوه ع الريحه ..
فيه قاعده عامه ؛ كلما قلت نسبه السكر بالنسبه للبن ؛ زادت درجه جمدانك و برنستك و مزاجك ..😉
6- الساده : ليفيل الوحششش خلاص إنت كده برنس و قد المجازفه إلـ وصلتلها الموضوع أكبر من تخيلك بكتير إنت كده عاشق للقهوة و مزاجك عال العال و مفضليين النوع ده وحوووش مبيخافوش من أي حاجة .. مع آخر رشفه من فنجانك السادة بتحس بإنتصار و إستمتاع و مزاج عاااااالي .. كدة بنرحب بيك في عالم العشق القهوجي💪🤗

يا تري إنت قهوتك أي نوع فيهم؟ 🤔☕

مصريات

قائد الجيش المصري «حرو إم حب» راكع قدام الإله آتوم على عرشه وبيقدمله قربان من النبيت الفاخر المختوم
التمثال ده من التماثيل الواضحة اللي ما مستهاش الإيدين اللي دمرت تماثيل تانية للآلهة
" حرو إم حب "  (أو حورمحب زي ما اسمه اتحرف)
آخر ملوك الأسرة 18 .. مات وما خلفش ولي العهد
(غالباً مراته ماتت وهي بتولد) فبالتالي بعده
 الكاتب «بارعمسسو» .. اللي بقى اسمه بعد كدا
«رعمسس الأول» وبدأ الأسرة 19.

فنون الطهى

شوية تكات فى الطبخ.......مفيدة جدااا

الفراخ:
********
🐔قبل لما تسلقي الفراخ شوحيها مع فصين توم بتبقي الشوربه حلوه اوي
🐔حضرى خلطة تحمير الفراخ (الدقيق-النشا-البقسماط-الملح-الفلفل-التوابل الخ) فى برطمان كبير وضعى به معيار يسهل الاخذ منه عند كل تحمير
🐔 حطى شويه بيكينج بودر ومعلقه نشا مع البقسماط وانتى بتحضري البانيه او الفراخ الكنتاكى بتبقى مقرمشه وطعمها حلو
🐔حطى شويه عسل ابيض مع تتبيله البانيه
🐔حطى شويه لبن على خلطة البانيه او زبادى بيبقى خطير
🍡 (الكفتة) فصين توم مفرومين مع عجينة الكفته مذاقها بيبقي روعة
🍡حطى ع الكفته معلقة بيكينج بودر علشان تنفش واطفى الفحم قبل ما تصبعى وياريت لو تتعمل من بليل
ـ وكمان الحواوشى اعمليه بنفس طريقة الكفتة بالثوم
: البيتزا :
********
🍱الزبادى ف العجينة بيفرق كتير وعلشان تشد زى برة بنحط البيتزا عشر دقايق وأول ما تستوى نخرجها ونحط الجبنة يدوب تسيح بتبقى بتشد زى برة حطى معلقتين او ربع كوباية
🍱لما تيجى تسخنى البيتزا فى الفرن لو بايته حطى معاها فنجان او طبق فيه ميه هتخليها طازة وتحفه
ـ البيتزا لما تيجى تبططيها خليها على دقيق السميد( سمولينا ) هتبقى زى بتاعت المحلات
المكرونة الباشميل :
**************
🎀صينية مكرونة بالبشاميل معلقتين لبن على وش صنية المكرونه بالبشاميل وترشي حبة فجيتار عليهم عالوش
🎀صينية مكرونة بالبشاميل شوية جبنه رومى مبشوره ع البشاميل وهو ع النار بيغير الطعم جدا
🎀البشاميل بعد ما تطفي عليه وهو سخن حطي جبنة موتزاريلا كتير هتسيح جواه وبعدين حطيه علي المكرونة بيخليها بتمط وتحفة وعلي الوش ابشري جبنة رومي
🎀البشامل بعمله نى بيكون خفيف بقشطة اللبن مع الدقيق مع لبن وتوضع على النار هاتعمل بشاميل من غير مانحمر الدقيق ولانضع اى سمنه صدقونى هاتعجبكو
🎀 بدل ماتحطي بيض على وش صنيه المكرونه حطي قشطه هتلاقي لون وطعم رائع
-المكرونه بالصلصه اسلقي المكرونه ربع سلقه وخليها تستوي في الصلصه ومتسبكيش الصلصه اوي هتلاقيها احمرت بزياده
الصلصة:
********
- سنة سكر علي اي اكل بتطبيخه
-صلصه الفته حطي فيها بشره جوزه الطيب
-حطي ملعقه سكر مع اي طماطم اوصلصه في اي اكله وبردو مع تتبيلة الفراخ
-وانتي بتحمري البصله لاي خضار حطي عليها فلفل اسود وشمي احلي ريحة صلصه
-التكة الاساسيه السكر مع اللحمه مع الطماطم مع الملوخيه.
: الملوخية:
**********
🍵علشان تأكلى احلى ملوخية اعمليها بشوربة الفراخ وتكونى بشرة جزرة متوسطه مع الفراخ وهى بتتسلق وتصفى الشوربة وتعملى بيها الملوخيه الجزر بيحلى طعم الملوخيه جدا (تكتى )
🍵الملوخية الخضرا بعد ما تحطيها في الشوربة حطي معلقة سكر بيخليها حلوة اوي
🍵 الملوخيه وانا بخرطها بخرط معاها قرن فلفل بيديها طعم جنان وطبعا معلقه سكر صغيره وقت السوا وفي الطشه بعد ما احمر التومه والكزبره ببشر طمطمايه صغيره واسيبها تتسبك مع الطشه واحطها على الملوخيه طعمها بيبقى جميل
اللحمة:
******
🍣انقعى لحمة او فراخ فى ميه وخل قبل ماتسلقيهم بساعة عشان يستوا بسرعة
🍣ملعقة سكر مع كباب الحله علشان اللحمه متسودش
🍣علشان اى لحوم تستوى بسرعه تحطى نص معلقه سكر وتهدى النار عليها(نص معلقه سكر في اي اكله هتفرق معاكي كتير دي تكة شيفات)
🍣تسويه الاكل على نار هاديه اطعم بكتير
🍣لما تشوى الريش او اللحمه أمسحى على اللحمه والريش بفرشاة فيها زبدة قبل السوى ب 10دقائق(ممكن تحطى عسل نحل كمان واووووو على الطعم )

السمك:
*******
🐠لما تيجى تقلى السمك لو حجمه كبير افتحيه بالسكينه فتحتين علشان ميبقاش نى من جوه
وكل ما كان فى التتبيله اكتر كل ماكان احلى
🐠 السمك البلطي جبيه كبير وقسمي نصين وعملى في فتحات فى البطن والظهر والجنب
وتبليه بملح وكمون وبابريكا وتوم بودر ولمون كتير
وقلبيه فى دقيق مع نشا واقلية مع زيت غزير
وكلى احلى سمك دهبي ومقرمش والزيت زي الفل ..على عكس التوم الصحيح والفلفل بينزل فى الزيت ويتحرق وبيخلى السمك تقيل
الكيك:
******
🍔لما تعملى الكيكه ومعندكيش فانيليا حطى معلقه عسل ابيض
🍔الكيكه ضيفي معلقه خل وانتي بتضربي البيض هتبقي هايشه جدا
🍔لو عندك لبن قاطع احفظيه فى الفريزر واعملى بيه بشاميل او كيك
العصاير:
*******
معظم العصائر بضيفلها شويه فانيليا بتخليها جميله
التوابل:
*******
🍲مش بستعمل توابل غير الفلفل والكمون والحبهان فى الاكل كتر التوابل بتضيع طعم الاكل
وكتير جداا مش بأستعمل غير الملح والفلفل اسود فى معظم أطباقى .
المحشي:
*******
🍟وانتي بتسقي المحشي حطي مع الشوربه اللي هتسلقي بيها شويه زيت ذره وفلفل اسمر وشطه ومعلقتين صلصه هتخلي طعم المحشي جميل وبيلمع.

طريقه عمل الروانى فى البيت

انهارده هنعمل احلى واجمل صنييه روانى فى البيت 

سهله وبسيطه وبأقل تكاليف

المقادير....

4بيضه

نصف كوب سكر 

3/4كوب دقيق ابيض

3/4كوب سميد بسبوسه

1/2معلقه فانيليا

1/2معلقه بيكنج بودر 

لعمل الشربات ..

2كوب سكر

2كوب ماء 

طريقه التحضير...

اخلطى المكونات الجافه من دقيق وسميد مع بعض 

اضربى البيض مع السكر فى إناء عميق حتى يتضاعف حجمهم مع الفانيليا

ضيفة المكونات الجافه واستمرى فى الخفق حتى تتجانس مع بعض

افرديها فى صنييه مدهونه بالسمن

حطيها فى فرن على درجه حراره 180 درجه

بعد ما تخرج من الفرن ا سقيها بالشربات البارد وهى سخنه للتزيين رشى عليها جوز هند 

وبالهنا والشفا